مرحبا ..
اخيررررا لقيت وقت اني اكتب موضوع هذي الفترة مره مشغولة
بس مره وحشني التدوين وقلت لازم اليوم اكتب موضوع
وراح يكون عن محتويات شنطتي و شنطة الميك اب الي اخذها بشنطتي
وكمان شنطة الشهره او الطلعات الخفيفه
يلا نبدا
نظرة سريعة على المحتويات
معقم ومناديل ديتول , ومناديل تغليفها كيوت من دايسو
نظارتي الشمسية مره حابتها وما غيرتها من فترة من قوتشي
محفظتي من سويت بلانكو مره حابتها لانها كبيرة من داخل وتشيل بطايق وحاجات كثير
الصورة ظالمتها بالطبيعة احلى
نجي لشنطة الميك اب
احبها كبيرة عشان احط فيها اغلب اغراضي حتى الي مو متعلقة بالميك اب
م احب الاغراض تحوس بالشنطه الكبيره عشان كذا احطها هنا ويسهل الوصول لها
بداخلها
- معقم من زهور الريف ريحته قويه ويلزق شوي بس م يطول ويصير عادي
- لبنان اكسترا مهم يكون عندي
- اوراق تمتص دهون الوجة لما تكوني حاطة ميك اب من ذا بودي شوب
- كريم يد من لوكسيتان
- مبرد اظافر من ذا بودي شوب
الميك اب الي حاطته هنا غالبا م استخدمه ف اخلية هنا في حال رحت مكان فجاة او حبيت احط ميك اب
يكون عندي حاجات مو مره حابتها لكن تؤدي الغرض
- فرشة بلشر او باودر من ايسنس
- بلشر بيبي بينك من بورجوا
- برونزر من ميبلين لونه جدا خفيف يبغالة طبقات عشان يوضح واحيانا استخدمه اي شدو للكريس
- قلوس من لانكوم
- ريفلون ليب بتر
- روج من برجوا الحلو فيه انو ثابت مره وسبق اتكلمت عنه
- عبلة الحواجب من ذا بودي شوب
- الانبوبين هذول مدري ايش اسمهم لكن هيا الي تعبي فيها العطر مره اسهل من اني اخذ العطر بحجمة الكبير
- ربطه وكلبسة وبنس شعر
- كحل ابيض واسود
- مسكرا ايبونس من لانكوم
نجي لشنطة السهرة هذي الفترة مره حابه الجميلة هذي
تناسب حاجات كثير وشيك وحجمها حلو
الصوره برضو ظالمتها
- غالبا اخذ فيها باليت يكون مرايته حلوه وغالبا برضو يكون هذا الباليت الجميل من ديور
- برش صغنونه
- اوراق ذا بودي شوب
- علبيتن صغنونة اخذتهم من ذا بودي شوب لما طلبت عينات للزبدات حقتهم وحده احط فيها كريم يد ووحده معقم
- انبوب العطر
- و اعواد المكياج
وبس هذا بوست اليوم اتمنى يكون عجبكم واشوفكم بموضوع ثاني قريب ان شاء الله
مره احبكم وانتظر تعليقاتكم
بحفظ الرحمن
ليست هناك تعليقات:
إرسال تعليق