مرحبا ي جميلات
في البداية قبل م ابدا البوست حابة اشكر الجميلة حنان لانها صممت لي شعار للمدونة
وفهمت ايش ابغى بالضبط بدون كلام كثير وما احتجت اعدل بعدها شي
بجد انسانة ذوق وحبوبة والتعامل معاها جدا مريح
حنان الجميلة الف شكر يعطيك الف عافيه حبيبتي
وهذا حسابها بتويتر
@HananAlhaidan
..............
والان نبدا ب موضوع اليوم
قبل فترة اشتريت جهاز وفرش سيقما وقلت لكم حجربها واقول لكم راي فيها
الجهاز مع الفرش
الجهاز يجي بعلبة مره جميلة وقوية تتحمل وتحمي الجهاز والفرش
اخدتها معي مره بالسفر جدا عملية واحلى شي انو الجهاز يشتغل بالبطارية
م يحتاج شحن ولا افياش كهربا
الجهاز يجي معه 3 فرش لكل فرشة استخدام
الجهاز عموما فايدتة التنظيف العميق للبشرة
وحركة الفرش تساعد على التقشير البسيط للبشرة وبالتالي يساعد في تنظيفها
وتوحيد لونها والتخلص من مشاكل التصبغات و الحبوب وما الى ذالك
عيب الجهاز انو قوي يعني تحتاجي قوة عشان تفتحي غطا البطارية
وكمان لما تفكي الفرش وتركبيها
الجهاز يحتوي على سرعتين متوسطه وقوية
اول فرشة تناسب جميع انواع البشرة م عدا الحساسه
اتوقعتها تكون قاسية وقوية لكن بالعكس تنطف كويس وما سببت لي اي مشاكل
اول يومين كنت استخدمه على السرعه المتوسطه عشان اعود بشرتي عليه
وانصحك انتي كمان لو حابة تجربية تبداي بيها
الفرشة الثانيه للبشرة الحساسه او الي تعاني من مشاكل
مصنوعة من السليكون بعكس الاولى الي من شعر زي البلاستك
جدا ناعمة وتنظف كويس استخدمها لما تطلع لي كم حبة او يجف وجهي من البرد
وتكون بشرتي حساسه شوي
اخر قطعه للمساج وهو مفيد لتنشيط الدورة الدموية بالوجه
نادر م استخدمها واستخدامي لها لما احط كريمات الليل احيانا تكون كثيرة
ف احط الكريم وامشي عليه الجهاز يساعد البشرة انها تمتص الكريم وتسوي مساج جميل برضو
رايي في المنتج بشكل عام
جدا حبيته ومن الاساسيات عندي لان لما انظف بشرتي فيه بجد الاحظ فرق احس بشرتي نظيييييفه وتتنفس
واستقبالها للكريمات والمنتجات افضل بكثير
ومع الوقت حسيت وجهي نور وصفي
كنت ناوية اشتري جهاز كليراسونيك وهو نفس فكره سيقما بس حبيت اجرب سيقما لان سعرها ارخص ومتوفرة اكثر
ومره انبسطت انو اشتريتها وقريب ان شاء الله راح اجرب فرش الجسم
انصح كل بنت انها تشتريه راح يكون استثمار جميل وطويل الاجل
اشتريته من مندوبة سيقما ذكرت حسابها في تويتر ب 250 ريال واشوف سعرها افضل بكثير من تاجرات ثانيات
نجي للفرش
اول فرشة هي فرشة الفونديشن f80
كثير مشهورة بسبب تغطيتها و شكل الفونديشن معها
شعراتها مسطحه تساعدك توزعي الاساس بشكل جميل ومتساوي لكل الوجه
طريقتي احط الفونديشن بشكل نقط بعدين اطبطب بالفرشة واوزعة ع كل وجهي بعدين ادمجه بشكل دائري
والنتجيه جميلة جميلة برضو انصحكم فيها واعتبرها من اهم الفرش الي لازم تكون عند كل بنت
عشان الاساس يطلع بيرفكت
ثاني فرشة للكونسيلر p88 تشبة الاولى لكن الفرشه هذي مشطوفه او مايله
في منها نفس فرشة الاساس لكن انا فضلت هذي لان راح اتحكم فيها للكونسيلر اكثر
تحت العين
مره حبيتها في دمج الكونسيلر وتغطيه الهالات واستخدمها نفس طريقتي في الاسااس
وكمان للحبوب او اثار الحبوب او تحديد وتغطية الاماكن الصغيرة بالوجه
شكلها من قريب
اخر فرشه جاتني هديه منهم وهي فرشة الاي لاينر
مررره جميله اكثر شي عجبني فيها انها صغيره اقدر اتحكم فيها بسهوله
وكمان راس الفرشة نتفه يعني اقدر ارسم الخط نحيييف وبعدين اعرضه ع كيفي
وبالنسبة للكات اي تطلع الرسمه حاده بدون تعب
ملاحظه عن فرش سيقما
العيب فيها انها صعبة التنظيف حسيتها غير عن الفرش الثانية تتعبني ع م تنظف ويروح اللون منها
وبس هذا بوست اليوم اتمنى تكونو استفدتو واذا عندكم اي استفسار انا بالخدمه
وكمان بنات انا كبرت حجم الصور قولولي اذا حبيتوها كبيره كذا ولا ارجع حجمها الي بالمواضيع الي قبل وكمان الخط تمام او لا وشكرررا
وكمان بنات انا كبرت حجم الصور قولولي اذا حبيتوها كبيره كذا ولا ارجع حجمها الي بالمواضيع الي قبل وكمان الخط تمام او لا وشكرررا
بحفظ الرحمن
ليست هناك تعليقات:
إرسال تعليق