منتجات خلصتها برجع اشتريها او لا ..

مرحبا بنات 

تدوينة اليوم عن منتجات خلصتها وتقيمي لها سواء حبيتها او لا 

احب هذا النوع من المواضيع تفيدني شخصيا وان شاء الله انتو تستفيدو كمان 

يلا نبدا 

 المنتجات الي حتكلم عنها واخيرا راح ارميها :)

• منتجات برجوا الجديده للجسم 

او شي لفتني فيها التعليب مره كيوت ويفتح النفس 

من اليمين مزيل عرق بخاخ ريحته قوية ومزعجه مره بالنسبه لي مره مره م حبيتها 

غير عن كذا ادا وظيفته ك مزيل عرق 

م راح اشتريه مره ثانيه 

• ثاني شي غسول للجسم بالورد و المفروض انو ريفرش يعني انتعاش وكذا  

 ريحته ابدا مو ورد ريحة صناعية مززززعجه وتكتم بالقوة خلصته بس م تمسك الريحه بالجسم وهذا اهم شي 

غير عن كذ ينشف ويجفف الجسم مره 

الشي الحلو الوحيد فيه انو خالي من مادة الباربان المضرة و هذا شي كويس 

وطبعا م راح ارجع اشتريه 

• كريم اليد من دوف بزبدة الشيا و الفانيليا , جدا جميل من ناحية الرائحة انا مره احب الفانييليا و كمان ترطيبه مره حلو ويمسك ب اليد  وما يدبق وياخذ وقت عشان تمتصه البشره 

اشتريته كمان وراح اشتريه برضو لانو عجبني 

• غسول الحسم من مجموعة ديب نوريشجن او الترطيب العميق , شي مره جميل يعني لما يكون غسول الجسم م ينشف مره حلو , ولما يكون فيه ترطيب احلى واحلى وهذا الشي الي لقيته بالغسول . لطيف ع البشرة مره وريحته حلوه ويخلي بشرتي نديه واحيانا م احتاج مرطب جسم لو كنت مستعجله وهذا شي م كنت متوقعته من غسول جسم 

اشتريه كمان وراح اشتريه لانه جممميل 

• من اليمين زبدة لليد والقدمين من مجموعة الاملاح الافريقية من بودي شوب . تحتوي على العسل وشمع العسل . جميلة و ترطيبها مره كويس وريحتها حلوه تناكل بس ثقيييله وتدبق م ينفع تستخدميها الا بالليل بس 

ممكن ارجع اشتريها بالشتاء

• زبدة الكاكاو للترطيب من بودي شوب . ترطيبها جميل وعميق تنفع للشتاء مره وما تدبق كثير وما تاخذ وقت برضو عشان تمتصها البشره . ريحتها عاديه مو سيئه لكن م حبيتها وتظلل بالجسم فترة طويله 

م اتوقع راح ارجع اشتريها 

سبراي مثبت للشعر من اوريال 

احسن سبراي جربته من ناحيه الثبات وانو م يبين انك حاطه مثبت بشعرك ويخليه خشن وملبد مهما حطيتي منه م يلبد ويكرمش الشعر 

عيبه الوحيد والي م يطاق ريحته قوية ونفاثة بس تخف مع الوقت وتختفي 

راح اشتريه لانه جميل ومناسبني 

صابونة الكبريت للوجه 

وظيفتها تنظف الوجه وتجفف الحبوب وتعقم البشرة عشان م تطلع حبوب جديدة وتجفف الحبوب

طبعا كل بنت تجيها فتره يقب وجهها حبوب بسبب توتر او هرمونات او عوامل ثانيه 

و قررت اجرب هذي الصابونه وفعلا تاثيرها حلو 

احسها تعقم البشرة وتصفيها مع الوقت و تساعد في تقليل الحبوب حتى الي تحت الجلد تصغرها مره 

بس تجفف مره يعني ضروري مرطب كويس 

برجع اشتريها لو احتجتها 

معقم يد من صيدلية بوتس 

اتوقع كنت اوزعه ع العالم عشان يخلص هههههههه

عيبه انو يلبد ع اليد ويطلع حاجات كذا كانها حبوب او كتل مدري كيف المهم مو حلو ومو بس انا الي يسوي لي كذا

م راح ارجع اشتريه 

مزيل شعر الوجه من بوتس 

سبق وكتبت عنه بالتفصيل في موضوع عنايتي ببشرتي 

الخلاصه انو جميل وراح ارجع اشتريه 

اخر منتجين الوحيدين من الميك اب 

• مسكرا من شانيل للتطويل , مش ذاك التطويل جدا جدا عاديه تعطي منظر طبيعي بس , الحلو فيها م تكتل وتفرق الرموش مره كويس 

م برجع اشتريها في كثير مسكرات افضل 

• ايلاينر من مايبلين ثاني واحد اخلصه , سواده كويس مو فاحم ولا فاتح . الرسم فيه حلو وسهل وسريع للاستخدام اليومي و فرشته ثابته م تتحرك بيساعدك لو انتي مبتدئة 

ممكن ارجع اشتريه لان جميل وسريع

وبس هذا موضوع اليوم لو حابين مواضيع زي كذا ثانيه خبروني 

ولو عندكم اقتراحات وافكار لمواضيع او منتجات حابين اتكلم عن اتواصلو معي ع الاسك او تويتر او الايميل  كل الروابط تلاقوها بالمدونه فوق 

شكرا ع دعمكم وتواصلكم شكر من قلبي لكل وحده فيكم 

بحفظ الرحمن