السلام عليكم
كيفكم حبيباتي ...
بوست اليوم حتكلم عن مكياج الخريف والشتاء وكل الي يتعلق بيه
اليوم حيكون عن الارواج والبلشرز والمناكير
والجزء الثاني حيكون عن الفونديشن والشدوات وحاجات بسيطه
.....
طبعا الخريف والشتاء يتغير الجو وتتغير معاه الوان الملابس والميك بنفس الوقت
تكون الوان غامقه ودافيه .. حلو التغير بين المواسم يحسسك بشعور جديد
اوكي يلا نبدا ب الارواج
انا انسانه م احب اكثر ارواج اذا روج عجبني استخدمه كثير واحب ادمج بين الالوان واطلع الوان جديده
والي م احبه اشوف احد غيري ممكن يستفيد منه
زمان م كنت اتجرا استخدم الوان غامقه بس الان بالعكس استمتع مره
ف الي لسه م اتعودت عليها راح احط لها كم خيار الوان محايده
طبعا حاولت اوضح السواتشات قد م اقدر
نبدا من اليمين
- من ماك الروج الاحمر المعروف russian red
احمر مات لونه كلاسيك مره جميل اتوقع يقبل جميع البشرات
ثباته مره حلو يطول م يسيح بما انو مات ولونه احمر من قلب
اذا حابة لون احمر يناسب جميع الاوقات انصحك بهذا الروج
- الثاني من مكياجي مجموعة انا حلوه الي صدمني ان الروج سعره 19 ريال وقت م اشتريه
و ع انو سعره رخيص الا انو مره عجبني لونه وثباته
لونه عودي كريمي تقدري تتحكمي في انك تغمقيه او تخففيه رقمه 12 duba
- الثالث من ريفلون عودي بس خفيف يميل للفاتح اكثر يعني الي حابه تمشي مع الوان الخريف
ومو متعوده ع الغامق ينفع لها لونه هادي وكريمي بس مو ثابت يحتاج تعيدي عليه
من مجموعة revlon colorburst
رقمه raspberry 045
-الرابع من ريميل لونه العودي الي جاي ع موف غامق
يعني يميل للموف اكثر , كريمي جميل ولونه واضح وثباته جدا كويس
رقمه cutting edge 120
- الخامس قلوس من نيكس , انا مو مره مع القلوسات بس هذا مره جميل م يلزق
ولونه واضح مرره بس عيبه كريمي بزياده انا لازم استخدم محدد قبله عشان م يسيح
لونه احمر غامق وكل م كثري يغمق اكثر وريحته مره لذيذه
رقمه 126 plush red
صوره ثانيه للالوان
وهنا الوان ثانيه فاتحه شوي من الي قبل
- من اليمين روج من برجوا احمر مره حلو وثباته مررررره بطل وما ينمسح الا بمزيل مكياج
يناسب كثير بشرات بس عيبه ريحته م عجبتني وكل الالوان من هذي المجموعه مره ثابته
رقمه 80 fuchsia cosmopolite
-الثاني من ريفلون بنك على اندرتون موف نقدر نقول عليه وردي لحمي جميل وبسيط
كريمي شوي بس ثباته مو كثير
رقمه 460 blushing mauve
- الثالث من ريميل من مجموعة كيت موت روج مات بس مو ناشف يندمج بسهوله ومره
مريح على الشفايف وعلى قولة البنت الي تبيع روج اليسا ههههه
لونه قريب من الي قبله بس اغمق
رقمه 103
- الرابع من ماك من مجموعة amplified موف ليلكي مرره جميل كريمي بسيط وثباته جميل
حلو ك تغغيير عن الغوامق عن نفسي مره حابته
رقمه up the amp
- اخر شي القلوس الجميل الي اتكلمت عنه في مشترياتي
نجي للبلشر من ماك mineralize blush
م اعرف اذا اللون متوفر عندنا لاني اشتريته من مطار دبي
اول م شفت اللون احترت بس لما جربته مررره جميل غير عن الي تتوقعيه
برونزي على مشمي وفيه قلتر بس م يبان ع الوجه يجي كانه اضاءه
وثباته يجننن مره م يختفي احب احطه في المناسبات الي اطول فيها لاني م احتاج ارجع اعيد عليه
واحيانا استخدمه للكونتور اغمقه ويطلع بيرفكت
رقمه love joy
من ريميل بلشر مشمشي جميل ودافي ويتغير اللون ع حسب اذا كثرتي
او قللتي ناعم وهادي ويناسب هذي الاجواء
رقمه 111 coral
من ميبلين بلشر يميل للوردي ع موف او لحمي
السواتش ظالم اللون لانو احلى في الطبيعه
وبرضو يتغير اللون ع حسب استخدامك
عيبه انو لازم تحطي كم طبقه لين يوضح اللون وذا الشي يطفش
بس ك لون مره جميل
نجي للمناكير وبرضو يندرج تحت نفس الالوان
من ريفلون لون احمر يجنن يليق على كثير بنات
لونه واضح ومركز ومن النوع الي م يطول على م ينشف
انصح فيه اذا حابه لون احمر كلاسك يناسب كل وقت
رقمه revlon red 680
من opi من مجموعة liquid sand يعني السائل الرملي
ومن جد الاسم مره يقرب التشبيه للون
لون بنفسجي غااااامق وفيه حبوب زي الرمل
من جد مناكير عجيب اخذته من النمسا من بوتيك مره صغنون شفته بالصدفه
وقالت لي انو هذي الكولكشن اجدد شي نزل
ف اخذت هذا اللون واخذت ذهبي
السوواتش مره يقهر مو واضح اللون ولا التركيبه :(
المناكير هذا للتكسير بس انا استخدمه ك لون عادي ويطلع تمام
بنفسجي على عودي غامق كل م ثقلتي اللون طلع شي ثاني
من كشك مكياج ناسيه من فين
بس الي اعرفه انها شركة ايطاليه اسمها color cosmetic ورقمه 19
جربت كذا لون مناكير من عندهم وحبيتهم
هذا اللون من نفس شركة المناكير الي فوق
لونه عودي غامق م يمزح بس مره جميل وينشف بسرعه ولونه واضح ولمعته حلوه
وهذا النتفه برضو من نفس الشركه الي فوق عودي بس حلو مو غامق مره
رقمه 70
هذا المناكير من شركه فرنسيه تنباع في محلات التجميل او الاكشاك
مره جميله والوانها حلوه وثابته وتنشف بسرعه
لونه بني حلو مره ع اليد
اسم الشركه dazz matazz
رقمه dark chocolate 03
رقمه dark chocolate 03
الصغنون هذا سرقته من اختي لما جربته وعجبني وانصدمت انو كليرز الي احسه حق اطفال
منكيراته حلوه كذا
لونه رمادي ع فضي حلو مره ع اليد ولونه غريب
وينشف بسرعه
واللون هذا من ايسنس رمادي اغمق من الي قبل
جميل ولمعته حلوه وقويه مره
واخر لون من فلومار ماركة تركيه انتشرت في الاونه الاخيره
ب 10 ريال بس جميل ولونه يجنن وواضح وينشف بسرعه
هذي الماركه جربت فيها كذا شي ومره حبيتها وحسوي عنها بوست لوحدها
وبس هذا البوست اتمنى يكون عجبكم وتكون المعلومات والالوان واضحه
اخذ مني وقت ومجهود كثير بس اهم شي تستفيدو
شكرا على دعمكم وتواصلكم
وع فكره ترى اسمي لميس وذكرت ع الشي باول بوست في المدونه
وايوه ترى اسمي الحقيقي وما غيرته من بعد المسلسل التركي اسمي من يوم انولدت ههههههههههههههه
لانو تجيني اساله كثير عن اسمي وايش ينادوني وهل هو اسمي الحقيقي او لا
انتظر ارائكم واقتراحتكم على حسابي في تويتر
او الاسك
وع فكره فتحت حساب في الانستقرام تلبية لطلبكم
اشوفكم قريب
بحفظ الرحمن ...
