السسسسلام عليكم ..
كيفكم حبيباتي ان شاء الله تكونو باحسن حال ..
بوست اليوم تكملة ل سلسلة العناية الي ناوية اعملها , بديتها بالبشرة ..
والان حتكلم عن روتين الشور او الاستحمام اليومي السريع والاسبوعي وكمان الشهري ..
عشان مع بداية العام الدراسي الجديد نتحمس ونبدا نهتم في انفسها صح ونعطيها حقها وتزيد ثقتنا في انفسنا
يلا بسم الله نبدا ..
نبدا في الشعر اولا انا نوع شعري ويفي ناعم مع نفشة شوي تقهر بس سهل التحكم فيه
فروتي تدهن بسرعة ومن تحت عادي
حاليا انا مرتاحة ع لوريال وحابتها الشامبو لطيف ع الشعر
وينطف الشعر مره كويس ..
قبل كنت استخدم الابيض والاحمر حق الشعر التالف مع البلسم ومره حبيته وطولت عليه
بس بعد م صبغت لاول مره صرت استخدم هذا النوع للشعر المصبوغ وعيبة انو ينشف الشعر
وكرهته عاد الشعر بعد الصبغة خلقة يجف مو ناقص جفاف ..
اذا خلص م راح ارجع اشتريه
البلسم من مجموع التحكم بالفريز او الشعر المنفوش حلو ولطيف زي اي بلسم عادي احط شوي لانو اذا كثرت شعري يهجد مره ويلبد
الابيض شامبو من فيشي وصفته لي الدكتوره لما قلت لها ابغى شي يخفف دهنية فروتي بس بنفس الوقت م ينشف شعري
دايما الشمبوهات للشهر الدهني تنشف , فكتبت لي هذا ومن جد من جد ي بنات مره حبيته ينطف ينطف ولا ينشف الشعر
بالعكس يخليه منتعش وطبيعي ومره سيلكي
طبعا هذا روتين شور يوم ويوم او كل يومين لاني م اغسل شعري يوميا مضر ب الشعر
شي كمان انا كنت استخدم مجموعة تريسيمي ومره حبيتها وافكر ارجع لها
وبس كثرت كلام هنا :/
هنا الماسكات الي استخدمها مرتين بالاسبوع تقريبا
اليمين لوريال من نفس مجموعة البلسم مره جميل يخلي الشعر طري ومنظرة وملمسة صحي
استخدمه ع كامل الشعر بعكس البلسم الي من الاذن وتحت عشان م يدهن الفروه
والثاني من بوتس ماسك بجوز الهند
طيب اول شي مره يجنن ومره حلو ومره شعري حبه ومره انا احبه
<< واضح انو يجنن ههههههه
باختصار انا شعري مع الصبغة صار ناشف وكريه واتعب وانا امشطه وكنت المه طول الوقت من كثر القهر
بس بعد هذا الشي الجميل شعري رجع يجنن وصرت افتحه واستشوره ابشركم
طيب بما انو قلت لكم انو م اغسل شعري يوميا لانو معروف انو مضر ولازم الشعر يفرز دهون من الفورة شي صحي لها
فلما ابغى شعري يكون فرش وشكلو نظيف ويصير نظيف من جد
استخدم الشامبو الجاف من صيدلية بوتس
وظيفتة ينظف الشعر ويسحب الدهون وطريقته تبخيه ع الجذور او الشعر كامل زي م تحبي وتخليه شوي بعدين تمشي شعرك او تحركيه بيدك
النوع الي فوق انجبرت اشتريه لانو م لقيت النوع الي احبة تحت فقلت اجرب
حلو م عليه بس لازم تبخي كثير كثير عشان ينظف الشعر
م راح ارجع اشتريه
هذذا النوع الي احبه ومن جد كويس ودايما الاقية مخلص من الصيدليات :(
جربوه ومحا تندمو
طيب دحين الشعر بعد الشور لو كنت ابغى استشور او استخدم الاستريتنر او الفير ابخ من هذا الشي الموف الجميل اشتريته من صالون وبخته ع شعري بعذ القص وقبل الاستشوار
مره حلو يفكك التشابك ويخلي الشعر طري وحيوي وريحته الي حببتني فيه اكثر شي
فروتي على سويت على شي مره حلو
والي ع اليسار من بوتس برضو هوا عباره عن بلسم في بخاخ
يعني لو مستعجله م استخدمتي بلسم مع الشور
او شعرك طبيعته جاف ومنفوش جربي هذا
بلسم تبخيه ع الشعر وتحركي يديك بينه يرطب الشعر كانو بلسم بالزبط بس اخف شوي
نجي للشور جل الي م راح اذكر غيره لاني مره حبيته واتوقع م راح اجرب غيره لفتره
برضو من بوتس كان عليه عرض اشتري 2 بسعر 3 اغراني شكله فقلت اجرب
اخذت بالمانقو وخلصتة وبالبندق وخلصته وجاري التفنيش على هذا الي باللوز
ليش حبيتة ؟
لانو اول شي ينطف كويس وريحته حلو بس موقتة والاهم انو يرررررطب البشره
يعني لو مستعجله ولا كسلانه تستخدمي مرطب لو لوشن جسم هذا راح يفك ازمتك
نجي للتقشير الاسبوع من مرتين الى ثلاث مرات استخدم مقشر ستيفز ومرتاحة عليه حلو ويشقر كويس بدون م يجرح او يحسس البشرة , ابلل جسمي شوي واحط المقشر وابدا افرك ع خفيف ب الليفه وهذا وظيفة يشيل الجلد الميت والدهون المتراكمه
لاحظو اني قلت فرك خفيف لا تحسبي انو كل م فركتي كل م كان كويس بالعكس
الفرك القوي يحمر بشرتك ويحسسها وبالتالي تتحول لسواد وخشونه
........
وكمان استخدمت قبل فترة مقشر الاملاح الافريقية من ذا بودي شوب خلصته وما راح ارجع اشترية
حسيته مرطب اكثر من انو مقشر الحبوب تذوب بسرعة وما ينظف كويس
نجي دحين للتقشير الجاف هذاا الاكتشاف الجميل والغريب
طريقتة انو قبل الشور وانتي جسمك جاف تحركي الفرشة الي تكون نوعيتها زي كذا الياف مو بلاستيك
حقتي من بودي شوب وبتلاقي انواع برضو شفتها في بوتس اصغر
تحركي الفرشة من رجلك الين فوق بحركات دائريه باتجاه القلب
اول م تستخدميها جسمك يقشعر ويدغدغ وتحسي كددا مو حلو بس بعدين تتعودي ويصير عادي
م تجرح البشرة بس استخدميها كويس
غير فوائدها التجميلية زي نعومها وطراوة البشرة
وتوحيد اللون بالتدريج وصفاوتها
الا انها تحرك الدورة الدمويه وتنشط الجسم
جربوها وما راح تندمو ولو بحثتو في النت راح تنصدمو من فوايدها
استخدميها ع كيفك تقدري تخليها يومي او اسبوعي
بالنسبة للمنطقه الحساسة استخدم لها غسول سيبا ميد كل كم يوم شوي بس وتنظيف خارجي
حلو ينظف المنطقة ويعقمها , استخدمت قبل غسول كيرفوري بس حسيته عادي جدا مجرد ريحة
واستخدم كمان مناديل كيرفوري للمنطقة حلوه وتنفع للخرجات تخلي المنطقة فرش
والبخاخ الي جمبه هذي خلطه انا سويتها تجربه ومره حبيتها وحستمر عليها
عباره عن موية ورد و ملح و ومويه عاديه وشوي مسك ابيض اخلطيهم سوا وبعد كل حمام تقريبا بخي شوي ع المنطقة
حاولي م تكثري يعني مرتين او 3 في اليوم
الملح يعقم وموية الورد تشد وتعطي ريحة حلوه وتعقم برضو والمسك ريحة حلو وملمس حلو
صابونة ديتول استخدمها بين فترات ك تعقيم او قبل ازالة الشعر
المسك الاسود جدا حلو ومفيد ينظف ومذكور في السنة النبوية بعد الطهارة من الحيض
استخدمة مرتين تقريبا نقطة منه واستخدام خارجي
...................
الروتين الشهري او مرتين ب الشهر عبارة عن حمام مغربي
اشتري مجموعة الحمام المغربي من نزية او من العطار
ومشترية جهاز الساوننا بالبيت ومرتاحه عليه والنتايج م يحتاج اقول كيف
اذا حابين الطريقة بالتفصيل خبروني هنا او في تويتر
اخيرا مجموعة الليف الي استخدمها
الاورنج الشوشة هذي كنت استخددمها بس بطلتها من عرفت الليفة الفوشية الي كانها ايشراب اشتريتها من نكتار
استخدمها من فترة مره بطلة م اتوقعت تنطف كذذا حبيها تساعد في تنظيف الظهر وكل الاماكن ماهي خفيفه ولا خشنة ملمسها حلو
ومره انصح فيها
الليفه البنيه هذ من بدي شوب استخدمها مع المقشر او الحمام المغربي او ليفة الحمام المغربي الي الكل عارفها الخشنه
القلفز استخدمها للمنطقة الحساسه فرك بسيييط مع الغسول وانتبهي تستخدمي ليفة جسمك خلي لها ليفة خاصه
.......
وبس هذي نهاية البوست يارب م اكون نسيت حاجة او طولت بالكلام بس هدفي اوصل لكم المعلومات الي عندي والتجارب عشان تستفيدو
وملاحظة مره مهمه انا م امدح شي الا عن تجربة في حاجات اشتريها جديد واجربها بس م اتكلم عنها الا بعد وقت اكون كونت عنها فكرة كاملة
وبرضو راح اعمل بوست عن منتجات جربتها وما حبيتها ....
كنت حتكلم عن الروتين بعد الشور بس راح اخلي له موضوع منفصل لانو كددا حيصير كتاب مو بوست
ك العاده اي استفسار او افتراح او حابين اعمل بوست مفصل عن شي معين قولولي هنا او على تويتر
احبكم ومره فرحانه فيكم ومتحمسه اقدم لكم اكثر واكثر
ممتنة جدا .. بحفظ الرحمن
